قصيدة قوم يا مصري ( الجزء الأول )
قـوم يا مصري مصر أمك بتناديك
قوم نجيب الحق ليـها ولا ليك
قوم نجيب الحق للمستضعـفين
اللي ذاقـــوا المر صافي من سنين
واللي نامــوا في الشوارع عريانين
واللي ماتوا في البواخر غرقانين
واللي جوا القطر ماتو محروقين
واللي لسه بالطوارئ محكومين
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
قوم نخلي مصر أحلى من زمان
قوم نرجع لأمنا المجد اللي كان
يوم بهرنا الدنيا والعالم وليد
يوم فتحنا قلوبنا للفجر الجديد*
يوم رفضنا الظلم أيام العبيد*
يوم قاومنا الانجليز في بورسعيد
يوم عبرنا وانتصرنا في أحلى عيد
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
والحكاية تبتدي من السبعينات
لما مات ناصر وجه بعده السادات
جه وفك قيود ألوف من الاعتقال
جه يعيد البسمة لوجوه العيال
جه وخطط يوم عبورنا للقنال
جه وحرر أرضنا من الاحتلال
جه وأحيا في النفوس بعض الآمال
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
حبه واتلموا عليه الأمريكان
سرقوا فرحة مصر بالنصر اللي كان
سرقوا ثمرة كل سنوات الكفاح
أقنعوه ينسى الألم ينسى الجراح
أٌقنعوه ياخد الدولار ينسى اللي راح
أقنعوه يبني البلد يرمي السلاح
علموه معني سياسة الانبطاح
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
أقنعوه بالخصخصة سر النجاح
أقنعوه يمشي في طريق الانفتاح
انفتاح خرب ركائز الاقتصاد
انفتاح يخدم في صناع الفساد
انفتاح هرب فلوس برا البلاد
انفتاح يهدم قيم يفسد ولاد
انفتاح يقطع في أرزاق العباد
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
أقنعوه يعــمل سلام مع إسرائيل
والسلام في حد ذاته شيء جميل
بس لو كان العدو مش حرامي
ولا كان محتل أرضي ولا ناوي
ولا حبة اتلموا من فوق القهاوي
ولا نازل دبح فينا بالمطاوي
والقنابل والمدافع والكيماوي
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
قلنا بعد الليل بدأ يطلع نهار
يعني راح نعرف طريق الازدهار
واهو ننسى الفقر ونعيش في الرخاء
يعني نبني مصر ونعلي البناء
لجل سمعة مصر تبقى في السماء
لجل شعب مصر يشعر بالهناء
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
بس يا خسارة صاحبنا من الجنون
فجأة حط رموز بلدنا في السجون
والبطانة في النفاق أعطت دروس
فهموه إن شعبه من اللصوص
فهموه القوة في كتم النفوس
فهموه يشتم ويفرم أو يدوس
خلى حكمه لمصر في الآخر كابوس
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
والنتيجة في يوم بقى رمز الهوان
راح صاحبنا وهو وسط الصولجان
راح ضحية للبطانة والاستهانة
استهانته بشعب ما يقبل أهانه
راح ضحية للمهادنة والاستكانة
راح وخسرت مصر رمز لنصر جانا
راح وحمل مصر للنائب أمانة
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
والأمانة غالية للي يعرفوها
مصر أم الدنيا لما يحكموها
مصر مهد للتاريخ وللحضارة
مصر كانت دوماًَ للعالم منارة
مصر هبة النيل ورمز الاستنارة
مصر أهل للريادة وللصدارة
مصر بالتوحيد بنت أقدم حضارة
مصر حضن لكل أبنائها الحيارى
مصر للباغي وللطاغي مغارة
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
مصر في القرآن بلد أمن وسلام
بس يا خسارة تعبنا من الكلام
والحقيقة إن نائبه لما جانا
كان مثال للقناعة و للرزانة
كان مثال للطهارة وللأمانة
قال لابد الشعب يتجمع ورانا
لجل نبني مصر ونحقق منانا
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
جه وحامل هم كل المظلومين
ابتدأ يحرر جميع المسجونين
ابتدأ يكسب قلوبنا بالسياسة
ابتدأ يشكِّل لجان يعمل دراسة
ابتدأ يبني البلد يرفع أساسه
قال بلاش الحكم يبقى بالوراثة
و فترتين للحكم كافية للرياسة
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
حبة واتلموا عليه الكذابين
علموه ينسى هموم المحكومين
فهموه إن مصر محتـجاه
وإن حكم مصر ما ينفع بلاه
وإن ربك لجل حكمة اصطفاه
جابه ينقذ مصر ويحرر سماه
يعني بقى تلميذ في مدرسة الطغاة
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
وهو حاكم ربع قرن من الزمان
كله همه إنه يرضي الأمريكان
كل يوم قاعد يقابل في اليهود
اللي سرقوا أرضنا أرض الجدود
اللي حرقوا دمنا أحفاد القرود
اللي قتلوا أولادنا غدر ع الحدود
اللي خانوا الأنبياء نقضوا العهود
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
واهو حاكم ربع قرن من الزمان
خلى مصر تبقى رمز للهوان
خلي مصر تنسى أيام الحضارة
خلى مصر تبقى للتزوير منارة
والحرامي هو مسئول الإدارة
وكل حاجة بالفقاقة وبالشطارة
والبوليس هو اللي حاكم في الوزارة
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
وهو حاكم ربع قرن من الزمان
كل همه أولاده وأحفاده كمان
خلى مصر تبقى مرتع للفساد
الوظايف وزعوها عالقرايب والولاد
والمصانع ييبعوها بالخسارة في المزاد
والشباب ضايع وهارب من البلاد
والمرض بينهش في أجساد العباد
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
وهو حاكم ربع قرن من الزمان
كل همه الكرسي والعيشة في أمان
كل همه إنه يرضي في الديابة
اللي مصوا دمنا دم الغلابــــــة
والفساد بالكوم وسرقة ونهب يابا
واحتكار لكل حاجة من العصابة
والحكومة صوتها أعلى من النيابة
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
واهو حاكم ربع قرن من الزمان
خلى نص شعب مصر يبات جعان
خلى شعب مصر مش لاقي الرغيف
والمرتب يشكي ضعفه ورفع للأسعار مخيف
والمجاري وسط شارع مش نظيف
والشهامة والكرامة شيء سخيف
والسجون سكنوها كل حر أو شريف
وكله بالتعذيب يقر ويعترف وكمان يضيف
وانتخابات زوروها والقضاة خلوه رديف
وهو يتفسح في "شرم" والغلابة عالرصيف
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
* * *
قوم يا مصري مصر أمك راح تضيع
واحتكار السلطة أصله شيء فظيع
قوم يا مصري نبتدي نوحد جهودنا
قوم يا مصري نبتدي نجدد عهودنا
قوم يا مصري نبتدي نحرر بلدنا
قوم يا مصري نبتدي نثبت وجودنا
قوم يا مصري نبني مستقبل ولادنا
قوم يا مصري
قـوم يا مصري مصر أمك بتناديك
قوم نجيب الحق ليها ولا ليك
كتبها مهندس / سعيد الشرقاوي في 06:41 مساءً ::
5 تعليقات
في04,نيسان,2008 - 05:58 مساءً, محمد البحر كتبها ...
جزاكم الله خيرا واتشرف بدعوة سيادتكم لقراءة قصيدتي بنفس الاسم وابداء رايكم فيها ولكم جزيل الشكر
في05,نيسان,2008 - 03:47 صباحاً, مهندس / سعيد الشرقاوي كتبها ...
أشكر لك يا أخ محمد مرورك تغليقك وتمام يافندم تم المرور والتعليق
في12,نيسان,2008 - 02:14 مساءً, حادى العيس كتبها ...
م سعيد الشرقاوي : قوم يامصري ,,,, نعم سيقوم المصري وامته كلها كما الطوفان ,,
اتمنى لك السمو والارتقاء ,,,
للشعر والبيان في قلبك مكان ,,,
دام التألق والابداع ,,,
ارجو التواصل ,,,
جديدي بانتظار بصماتك ,,,
تحياتي لك
في18,نيسان,2008 - 07:32 صباحاً, مهندس / سعيد الشرقاوي كتبها ...
أخي الكريم / حادي العيس
أشكر لك مرورك وتعليقك الرقيق
وإن شاء الله يكون بيننا تواصل
تحياتي
في03,أيار,2008 - 08:36 صباحاً, ابن البلد كتبها ...
الغالي العزيز
قوم يامصري ... ؟
حرام عليك يامان عايز المصري يقوم ليه
خليه نايم شويه لما يكمل ال 30 سنه
خليه نايم لانه بجد تعب وكرهه نفسه وقرب ينتحر
وبيلعت اليوم اللي هايصحي فيه ويفوووووووووووووووووووق
من فضلك ممكن تدون بصوت خفيف شويه احسن المصري يصحي
وحدش يعرف ينيمه تاني